O monte de Piornedo
Xeoloxía
No ano 2023 a asociación O Teixeiro, cunha subvención da Reserva da Biosfera dos Ancares Lucenses, encargoulle ao xeólogo Fran Canosa unha guía sobre a xeoloxía de Ancares.
O obxectivo desta guía é mellorar a divulgación sobre os achados e as riquezas xeolóxicas de Ancares, que son descoñecidas ata para os propios habitantes da zona.
Rutas xeolóxicas
Deste traballo sairon dúas rutas xeolóxicas, unha delas que transcorre integramente polo monte e Piornedo, en concreto polo val glaciar que comeza nos Lagos da Braña e remata na Ponte de Bous.
Xeolodía Ancares 2022
O 7 e 8 de maio de 2022, a festa de divulgación da xeoloxía, adicou a súa edición a descubrir a serra dos Ancares.
Sentarse a observar a pegada do glaciar
Unha das paradas do roteiro guiado da aldea está adicada a observar desde un dos bancos do Viso, as pegadas que deixou o glaciar na paisaxe. Podes escoitar a Celtia contándoo aquí.
Bolos graníticos
Esta andaina xeolóxica está pensada para observar as pegadas deixadas polo xeo nas montañas dos Ancares ata fai uns 11.000 anos e tamén para poder ver os diferentes tipos de rochas, entre a que destaca o granito, aproveitado para fins construtivos na aldea de Piornedo.
Precisamente no lugar de Piornedo e nos seus arredores atópanse afloramentos de rochas graníticas, recoñecibles na paisaxe pola súa morfoloxía tan característica (bolos).
A presenza de granito nos Ancares é escasa, limitándose á zona de Piornedo e Moreira.
O choque de dous antigos continentes, fai 300 millóns de anos, e a intensa calor que acadou, foi o que deu lugar ás rochas que estamos a ver actualmente nesta parte dos Ancares Lucenses.
O val glaciar de Piornedo
Na cabeceira do val glaciar de Piornedo atópase o circo glaciar do Mustallar – Pico de Lanza, que durante a derradeira glaciación funcionou como zona de acumulación de neve e xeo que alimentaba ao glaciar desta parte dos Ancares.
Dentro deste gran circo, con varias crestas morrénicas, orixinouse un pequeno conxunto de lagoas, das cales parte a maior cantidade de auga do río que atravesa o glaciar de Piornedo.
Desde o cumio do Mustallar, a 1.934 metros de altitude, a vista panorámica do val glaciar de Piornedo é excepcional, apreciándose a maior parte das formas glaciares de acumulación e erosión observadas ata o momento.
