Este roteiro guiado está deseñado polos veciños e veciñas de Piornedo, a través das tres asociacións que hai no lugar:

• Asociación Cultural e de Veciños O Teixeiro.
• Asociación Teitos de Piornedo.
• Asociación de Propietarios do Monte de Piornedo.

Os nosos antepasados sumaron esforzos, compartiron traballos e puxeron en marcha iniciativas comunais para facer máis levadeira e doada a vida na montaña.

Hoxe, desde estas asociacións pelexamos por seguir facendo comunidade, por conservar a nosa memoria, por poñer en valor o noso estilo de vida e o dos nosos antepasados.

Estamos máis convencidos que nunca de que continuar traballando de forma colaborativa, xuntos, é a única forma para poder salvagardar o enorme patrimonio cultural, histórico e natural que custodiamos neste lugar.