O monte de Piornedo
O meu Compañeiro
O meu compañeiro é un poema que se foi transmitindo de forma oral xeración tras xeración.
A historia é truculenta, terrorífica, pero o seu interese non radica en absoluto na historia.
Léndoa, parece que nalgún momento, o lugar de Piornedo pasou por un tempo como o actual, de despoboamento e desmemoria. Daquela, alguén decidiu recoller moitos dos topónimos do monte e os nomes das casas nunha rima fácil para que puidera ser aprendida e transmitida oralmente ás xeracións seguintes.
Así chegou a nos a historia do meu compañeiro.
Pola nosa parte volvemos a facer o mesmo con esta páxina: tratar de preservar a maior parte dos nomes do noso monte, porque vemos que desaparecen co abandono do pastoreo e da gandaría ou se ven modificados por erros ou caprichos nas fontes escritas (así aparece agora Corno Maldito, la Campa de los Primos ou O Castelin, en troques do nome orixinal e correcto: Pico do Campo, Pico do Porto, Pena de Portelín…).
O meu compañeiro
Na ponte de Agulleiro perdín o meu compañeiro,
na Seara do Castro atopeinlle o rastro,
no Penedín da Braña a navalla,
no Chao das penas atopeinlle as medias,
na Fonte do Piornalón o pantalón,
na fonte do rego atopeinlle o mego,
na fonte fría a mallada onde durmía,
nas redondas atopeinlle as sombras,
en Pandeliños os zapatiños,
na pasada grande úa pinguata de sangre,
na pasada do horto atopeino morto.
Polas lastras leveinol arrastro,
en Camp Redondo collinol ó lombo,
no Recostín pouseinol un pouquín,
no Chao das Cabanas ¡como pesas meu marmallas!,
na Fonte do Torrón pouseinol un pouco bon,
no Chao da Tronca atopeinlle a conca,
no Vádagüela a cutiela,
no Chao Grande pouseinol un pouco grande,
nas penas de Campolongo collinol ó lombo.
Na casa do Coxo metéronol nun goxo,
na casa do Sesto nun cesto,
na casa de Mourazo déronlle cun angazo,
na casa de Don Pedro cortáronlle un dedo,
na casa de Perdigón tuvéronol un pouco bon,
na casa de Pedrete metéronol no retrete,
na casa do Ancho colgáronol nun gancho,
na casa do Coro nun corno,
na casa de Marelo meteronol nun mego,
na casa da Casoa nua banastroa,
na casa do Roxo déronlle cun ferro roxo,
na casa da Rigueira metéronol na porteleira,
na Casanova envolvéronol nua manta nova,
na casa de Poleo déronlle cun beo,
na casa de Robleo cun penedo,
ie na casa de Marqués partíronol en tres.