O monte de Piornedo
Arte rupestre
O noso monte garda tamén testemuña do paso das diferentes xeracións que durante séculos habitaron o lugar.
A xente de Piornedo empregou os recursos do monte para construír as casas, para quentarse no inverno, para alimentarse e mesmo para facer preparados menciñais. Todos estes usos, foron deixando unha pegada que nalgúns sitios aínda podemos ver hoxe.
Coviñas
Cerca da Pena Chusmela, polo Camín da Braña, algo apartado para que non se estraguen, podemos atopar varias mostras de arte rupestre.
Hai unha pedra plana (lastra) con varios grupos de coviñas ou cazoletas. Son a primeira manifestación de arte rupestre prehistórico e, entre os petróglifos galegos, considéranse uns dos mais sinxelos.
Datados da idade de Bronce (II milenio antes de J.C.), atribúeselles un significado simbólico-relixioso malia que non se coñece con certeza para que foron realizadas ou o que representan.
Por estaren preto dun paso elevado de montaña, segundo algún historiador, poderían servir na antigüidade para deixar ofrendas cando alguén tiña que atravesar por ese camiño (Monteagudo L.).
Hai mais coviñas noutros lugares do monte e seguramente nos queda moito por descubrir…
