Festa da pandeira de piornedo
A Festa da Pandeira de Piornedo nasceu en 2006 e celébrase dende entón todos os anos no terceiro sábado de agosto.
Congrega tocadoras deste instrumento das comarcas próximas á serra de Ancares (provincias de Lugo, Asturias e León) e serve tamén para reunir outros músicos de procedencias ben diversas.
Cada edición adícase a unha tocadora de pandeira das que participan neste encontro.
A pandeira
A tradición musical de moitos países, tanto atlánticos como mediterráneos, dende tempos remotos, inclúe instrumentos de percusión estreitamente emparentados coa pandeira, como as que protagonizan as festas no Magreb ou os bodrans irlandeses, moi popularizados através da música celta.
No traballo Os instrumentos musicais na tradición galega as pandeiras defínense como “pandeiros redondos (duns 40-50 cm de diámetro e 8-12 cm de alto) que levan algunhas ferreñas inseridas no marco (…) consérvase aínda o uso destes instrumentos, intimamente ligado ao canto, sobre todo feminino, aínda que tamén os homes as empregaban“.
Nas zonas de montaña “galaicas” este vello instrumento nunca foi substituído pola pandeireta e conserva a día de hoxe toda a súa vixencia. Atopámola nas comarcas de Ibias, Ancares e o Bierzo, cunha grande variedade de toques que van mudando por zonas e mesmo dependendo da tocadora.
Na Festa da Pandeira de Piornedo é posible coñecer este instrumento, os diversos xeitos de tocala e as cántigas que acompaña nas maos e nas voces das mellores tocadoras en activo.
Todas as edicións da Festa da Pandeira
Todas as edicións da Festa da Pandeira
Quen fai a Festa da Pandeira?
A Festa da Pandeira celébrase cada ano grazas á participación das tocadoras máis veteranas diste instrumento e, xunto delas, outros intérpretes notorios de música tradicional, que se desprazan dende os lugares máis afastados da montaña galega, asturiana e leonesa.
Somos as veciñas de Piornedo quen se ocupan de organizar o evento, contactando coas participantes e organizando todas as partes. Contan cunha rede de colaboradores que axuda na presentación, no deseño e na difusión.
Podes contactar con nós no correo electrónico festadapandeira@gmail.com ou a través da nosa páxina de Facebook, que podes ver aquí.
Ademais desta páxina web, tamén empregamos a nosa páxina de Facebook para ir subindo as novidades, cursos e imaxes das diferentes edicións da Festa da Pandeira.
Como chegar á Festa da Pandeira?
Piornedo, na parroquia de Donís (concello de Cervantes) é un dos puntos chave da serra que une as provincias de Lugo e León a cal dá nome á comarca de Ancares. O acceso máis sinxelo por estrada pódese facer partindo das vilas máis próximas:
Desde Becerreá (ata Piornedo vía San Román de Cervantes).
Desde Pedrafita do Cebreiro (ata Piornedo polo Portelo e vía Doiras).
Desde Vega de Espinareda (ata Piornedo polo porto de Ancares).
Algúns navegadores GPS ofrecen a ruta por Quindous e Donís. Só a recomendamos para vehículos con tracción ás catro rodas.